Россия терма жамоаси ва “Зенит” ҳужумчиси Александр Кержаков фаолиятини якунлаб, Россия футбол иттифоқига ишлашга ўтиши мумкинлигини айтди. Бу ҳақда Россия спорт вазири Виталий Мутко матбуот-анжуманда журналистларга маълум қилди.

32 ёшли футболчининг “Зенит” билан шартномаси яна бир мавсум амал қилади. Бироқ петербургликлар бош мураббийи Андре Виллаш-Боаш Кержаковни асосий таркибда кўрмаётганини айтган.

“Александр фақат “Зенит”да ўйнашни исташини айтмоқда. Агар уни жамоада ўйнашини исташмаса, унда у фаолиятини якунлаб, РФИга болалар футболи, терма жамоалар билан ишлаш учун ўтиши мумкин. Эртага у билан учрашиб, бу вазиятни муҳокама қиламиз”, деб айтди Мутко.

Кержаков “Зенит” сафида 2001-2006 йиллар, 2010 йилдан ҳозирги вақтгача ўйнаб келмоқда. У, шунингдек, “Севилья” ва Москванинг “Динамо” жамоасида ҳам тўп сурган. У 352 та ўйинда 194 та тўпга муаллифлик қилган.

Кержаков Россия терма жамоаси сафида 89 та ўйинда майдонга тушиб, рақиблар дарвозасига 30 та тўп киритган. У шу натижаси билан Россия терма жамоаси тарихидаги энг яхши тўпурар ҳисобланади.