АҚШлик машҳур актёр Жонни Депп Грецияда 4,2 млн еврога кичик орол сотиб олди, деб Лондондаги Proto Organization кўчмас мулк компаниясига иқтибос келтирган ҳолда Athens Macedonian News Agency агентлиги хабар бермоқда.

Қайд этилишича, оролнинг майдони 0,2 кв км ни ташкил қилади ва айни пайтда кимсасиз ҳисобланади. Депп июль охирида бир неча кун аввал харид қилган Stroggino деб номланган ушбу оролга ташриф буюришни режалаштирмоқда.

Proto Organization компанияси, шунингдек, Анжелина Жоли ва Брэд Питт жуфтлиги томонидан Грецияда орол харид қилинишида воситачилик қилган.

Аввалроқ Грецияда яқин йилларда ороллар оммавий тарзда сотила бошланиши маълум қилинганди.