Москванинг "Динамо" жамоаси учун Петровск хиёбонида қурилаётган стадионга афсонавий дарвозабон Лев Яшин номи берилди. Бу ҳақда 17 июль куни шу муносабат билан ўтказилган маросим вақтида эълон қилинди.

Маълум қилинишича, бу янги стадионда "Динамо" ўзининг илк ўйинини 2017 йилнинг 22 октябрида, Лев Яшиннинг туғилган кунида ўтказади. "ВТБ Арена парк" лойиҳаси таркибида барпо этилган ушбу ўйингоҳ ўзида 26 минг 319 нафар мухлисни сиғдира олади.

Маълумот учун, Лев Яшин ФИФА версиясига кўра, ХХ асрнинг энг яхши дарвозабони деб топилган. У Москванинг "Динамо" жамоаси шарафини 1950 йилдан 1971 йилгача ҳимоя қилган ҳамда 5 марта Собиқ Иттифоқ чемпионлигига эришган. У СССР терма жамоаси сафида 1954 йилдан 1967 йилгача 74та ўйин ўтказган ва 1956 йилда Олимпиада ўйинларида, 1960 йилда эса Европа чемпионатида ғолиб чиққан. Лев Яшин 1963 йилда "Олтин тўп" мукофотини олган ва бу мукофотни қўлга киритган ягона дарвозабон ҳисобланади.

У 1990 йилнинг 20 март кунида, Москва шаҳрида 61 ёшида вафот этган.