16 июль куни ўзбекистонлик зиёратчиларнинг Рамазон мавсумидаги 166 нафардан иборат дастлабки гуруҳи умра сафаридан ватанга соғ-саломат қайтиб келди. Зиёратчиларни Тошкент халқаро аэропортида Дин ишлари бўйича қўмита, Ўзбекистон мусулмонлари идораси ҳамда бошқа давлат ва жамоат ташкилотлар вакиллари кутиб олди. Бу ҳақда Дин ишлари бўйича қўмита расмий сайти хабар қилган.

Зиёратчилар умра сафарига 6 июль куни жўнаб кетишган эди.

Маълум қилинишича, зиёратчиларга мавсум давомида ўзбекистонлик 2 нафар ишчи гуруҳи, 13 нафар гуруҳ раҳбари (элликбоши), 3 нафар шифокор ва 2 нафар ошпаз хизмат кўрсатди. Ўзбекистонлик зиёратчилар истиқомат қилишлари учун Мадина шаҳрида “Масжиди набавий”дан 100-150 метр узоқликда жойлашган тўрт юлдузли “Фейруз ал-Хайр” меҳмонхонаси, Макка шаҳрида эса “Харам масжиди”дан 1500-2000 метр узоқликдаги “Совфат ал-Мийаъд” меҳмонхонаси хизмат кўрсатган.
Зиёратчилар учун Саудиядаги меҳмонхоналарда сунъий йўлдош орқали Ўзбекистон телевидениеси дастурларини томоша қилиш, ватанда бўлаётган воқеалардан хабардор бўлиш имкониятлари яратилган.

Зиёратчиларни Саудия Арабистонида кутиб олиш, кузатиш ва уларга қулай шароитлар яратиш ишлари Дин ишлари бўйича қўмита, Ўзбекистон мусулмонлари идораси ҳамда Жидда шаҳридаги Бош консуллик таркибида жорий этилган «Ҳаж» ва «Умра» масалалари бўйича атташе ҳамкорлигида ташкил этилди.

Қўмитанинг кун.уз таҳририятига маълум қилишича, 18 ва 20 июль кунларида зиёратчиларнинг навбатдаги гуруҳлари Ўзбекистонга қайтиб келади. Жорий йилги умра зиёратига 670 нафар ўзбекистонлик йўл олганди.