Москва шаҳри (Россия)да қиличбозлик бўйича ўтказилаётган Жаҳон чемпионатида шпага бўйича шахсий ҳисобдаги мусобақалар якунига етиб, ғолиб ва совриндорлар номи маълум бўлди. Бу ҳақда Ўзбекистон Миллий Олимпия қўмитаси матбуот хизмати хабар қилган.

Эркаклар ўртасида ўтказилган мусобақада жами 205 нафар спортчи ғолиблик учун курашга киришди. Мазкур мусобақада иштирок этган ҳамюртларимиз Олег Соколов 24-ўринни, Руслан Кудаев 27-ўринни, Роман Александров 138-ўринни ва ниҳоят Алексей Тишко 156-ўринни эгаллашди.

Ушбу мусобақада ғолиблик Геза Имре (Венгрия)га насиб этди. Ўта муросасиз рухда ўтган ҳал қилувчи финал баҳсида франциялик Готье Грумьени 15:14 ҳисобида мағлуб этган Геза Имре жаҳон чемпионатининг олтин медалига сазовор бўлди. Бронза медалларга Чжун Сун Хва (Ж.Корея) ва Патрик Йоргенсен (Дания) сазовор бўлдилар.

Хотин-қизлар ўртасидаги мусобақада биринчи ўринни Роселла Фьяминго (Италия) эгаллади. Италиялик спортчи финалда швециялик Эмма Самуэльссондан 15:5 ҳисобида устун келди. Ушбу мусобақада учинчи ўринни Сарра Бесбес (Тунис) ва Сю Аньци (Хитой) эгаллади.

Эслатиб ўтамиз, мазкур жаҳон чемпионатида 2016 йил Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг лицензиялари ҳам ўйналади (аёллар ўртасидаги жамоавий рапира ҳамда эркаклар ўртасидаги жамоавий шамшир бўйича мусобақаларидан ташқари

Маълумот учун, халқаро қиличбозлик федерацияси шафелигида ўтказилаётган мазкур нуфузли мусобақада дунёнинг 108 давлатидан келган 912 нафар спортчи шпага, рапира ва шамшир бўйича бўлиб ўтадиган шахсий ҳамда жамоавий баҳсларда 12 комплект медаллар учун кураш олиб боришмоқда. Жаҳон чемпионати баҳслари 19 июлга қадар давом этади.