Қирғизистон АҚШ билан ҳамкорлик тўғрисидаги келишувни бир томонлама бекор қилиш ниятини билдирди. Бу ҳақда республика ҳукуматининг сайти орқали хабар қилинди.
Бу қарор қирғизистонлик инсон ҳуқуқлари ҳимоячиси, қамоқда умрбод озодликдан маҳрум қилиш жазосини ўтаётган Азимжон Асқаровга “Инсон ҳуқуқлари ҳимоячиси” мукофотининг берилиши муносабати билан қабул қилинди.

2010 йилнинг июнь ойида Қирғизистонда ўзбеклар ва қирғизлар ўртасида содир бўлган этник тўқнашувларда, расмий маълумотларга қараганда, 500 киши ҳалок бўлди, 2 минг киши яраланди. Республиканинг ўзбек жамоаси вакили бўлган инсон ҳуқуқлари ҳимоячиси ва журналист Азимжон Асқаров Жалолобод вилоятида этник ўзбекларга қарши содир этилаётган жиноятларни ҳужжатлаштираётган пайтда қўлга олиниб, қамоққа ташланди. Суд уни оммавий тартибсизликларни уюштиришда, этник нафрат қўзғатишда ҳамда милиция ходими Миқтибек Сулаймоновни ўлдиришда қатнашганликда айблаб умрбод озодликдан маҳрум қилиш жазосига ҳукм қилди.
Кеча АҚШ давлат департаменти Асқаровни “Инсон ҳуқуқлари ҳимоячиси” мукофоти билан тақдирлади. Айни пайтда 47-колонияда жазони ўтаётган Азимжон Асқаров ўрнига мукофотни унинг ўғли Шерзод қабул қилиб олади.
Бу Қирғизистон расмийларининг кескин норозилигига сабаб бўлди. Мамлакат ташқи ишлар вазирлиги бу борадаги баёнотида АҚШ мамлакатдаги этник тотувлик ва мувозанатни бузишга ҳаракат қилганликда айблади.
“Шу боис Асқаровнинг бундай олий мукофот билан тақдирланиши республика томонидан мамлакатимиздаги этник тотувликни бузишга қаратилган ҳаракат сифатида баҳоланади”, – хулоса қилинади баёнотда.
Шунингдек, ҳукумат вакиллари бундай қарор икки давлат ўртасидаги дўстлик муносабатларининг асосий принципларига зид келишини таъкидлаб ўтди.