Ўзбекистон мустақиллигининг 24 йили арафасида Самарқандда “Шарқ тароналари” халқаро мусиқа фестивалига тайёргарлик кўрилмоқда. Шу туфайли шаҳарда кенг миқёсда қурилиш ишлари олиб борилмоқда. Жумладан, Регистон майдонида янги амфитеатр қурилмоқда. У ерда мусиқа форумининг асосий тадбирлари ўтказилади.

Регистон ансамбли мустақил дирекцияси раҳбари Беҳруз Маъруфийнинг айтишича, майдонда кенг миқёсли реконструкция ишлари 2014 йилда ўтказилган эди. Жорий йилда эса амфитеатр қурилиши олиб борилмоқда.

Қурилиш ишларида замонавий технологиялардан фойдаланилмоқда. Майдонда янгича ёритиш тизими ўрнатилмоқда. Ишлар “Тошшаҳарнур” корхонаси мутахассислари томонидан германиялик ҳамкасблар иштирокида олиб борилмоқда. Янги тизимда меъморий ёритиш, лазер-шоу ва 3D форматидаги тақдимот кўзда тутилган. Бунинг учун амфитеатрнинг икки томонидан махсус мониторлар ўрнатилади.

Шу билан бирга, тадбирга тайёргарлик ишлари ҳам давом этмоқда. Майдонда қад кўтарган улкан саҳнанинг очилиш маросими репетицияси олиб бориляпти. Унда бадиий коллективлар, ансамбллар, фольклор ва этнографик гуруҳлар, эстрада хонандалари, ижодкор ёшлар иштирок этмоқда.