17 июль куни Ўзбекистон президенти Ислом Каримов “Ўзбекистон Республикаси давлат мустақиллигининг 24 йилигини нишонлашга тайёргарлик кўриш ва уни ўтказиш тўғрисида”ги қарорни имзолади.
Ҳужжат мустақилликнинг туб моҳиятини чуқур тушуниш, фуқаролар ва жаҳон ҳамжамиятига Ўзбекистоннинг ушбу йилларда босиб ўтган ривожланиш йўли, олиб борилган ислоҳотлар ва эришилган ютуқларнинг мазмунини етказиш, фуқароларни янги чўққилар сари интилишга руҳлантириш, мамлакатнинг энг асосий байрамини юқори савияда ўтказиш мақсадида қабул қилинди.
Давлат раҳбари Мустақиллик куни байрамини ўтказишга тайёрланиш бўйича республика комиссияси таркибини тасдиқлади. Комиссияга бир ҳафта ичида ташкилий-амалий, маданий-маърифий ва ахборий-тушунтириш тадбирлари дастурини ишлаб чиқиш топширилди. Дастурни тайёрлашда қуйидаги истиқболли йўналишларга алоҳида эътибор қаратиш тавсия қилинди:
Мустақиллик Ўзбекистон халқи учун миллий давлатчиликни, ўз ҳуқуқ ва қадриятларини, урф-одат ва анъаналарини, динини, тарихини ва аждодларининг хотирасини тиклаш, баркамол авлод тарбиялаш йўлида улкан имкониятларни очиб берганига алоҳида урғу бериш;
Ўзбекистон ўз вақтида маъмурий-буйруқбозлик тизимидан, бир ёқлама иқтисодиётдан, “шок терапияси” сингари моделлардан воз кечиб, беш тамойилга асосланган тараққиёт йўлини танлагани ва бу йўлда маълум муваффақиятларни қўлга киритганини акс эттириш, тараққиётнинг ўзбек модели номини олган стратегияни амалга оширишда эришилган ютуқларни ёритиш;
Яқин ўтмишда қолоқ аграр давлат бўлган, иқтисодиёти пахтачилик ва пахтани бирламчи қайта ишлашга асосланган Ўзбекистон бугун саноати ривожланган, иқтисодиёти тез суръатларда ўсаётган, юқори салоҳиятли юқори технологияларнинг жорий қилиниши ҳисобидан ялпи ички маҳсулотида саноатнинг улуши 25 фоизга етган давлатга айланганини кўрсатиб бериш.