Қарши туманининг Лаганди қишлоғида яшовчи Умиджон Раҳимов машиналарнинг техник созлиги ҳужжатларини сохталаштиришда айбланиб қўлга олинди. Бу ҳақда “Ҳуқуқ” газетаси хабар бермоқда.
Айтилишича, 2014 йилдан буён Mercedes-Bens 0303D русумли автобусда лицензия асосида ишлаб келган И. Қулмаматов машинанинг техник созлиги ва лицензиясининг амал қилиш муддати тугаганлиги боис фаолиятини вақтинчалик тўхтатишга мажбур бўлган. Кейинчалик у таниши Равшан орқали Раҳимов ҳақида эшитиб, унга мурожаат қилган ва техник созлик ҳужжатларини расмийлаштириб беришни илтимос қилган. Раҳимов бу ишни қилиб, бунинг эвазига 650 минг сўм олган. Аммо икки кундан кейин ҳужжатлар сохталиги аниқланган.
Автобусни текширувдан ўтказган ЙҲХБ ходимлари ҳужжатлар билан танишиб чиқиб, уларнинг сохталигини билиб қолишган. Шундан сўнг улар Қулмаматов орқали Раҳимовни топиб, қўлга олишган.
Тергов жараёнида аниқланишича, Раҳимов бу ишни ёлғиз қилмай, Қаршининг Қарлуқбоғот маҳалласида яшайдиган Баҳодир Ҳаким унинг шериги бўлган. Улар биргаликда бир қанча одамларга шундай “хизмат кўрсатиб”, пул эвазига сохта ҳужжатлар тўғирлаб бергани маълум бўлди.