Бутунроссия бадиий гимнастика федерацияси президенти, Россияда хизмат кўрсатган спорт мураббийи Ирина Винер-Усманова Халқаро Олимпия қўмитаси президенти Томас Бах томонидан жаҳон спорт ҳаракатига қўшган улкан хизматлари ва Олимпия ўйинлари идеалларига садоқати учун ХОҚнинг кумуш медали билан тақдирланди.

Винер-Усмоновани тақдирлаш маросими Россия Олимпия қўмитасида қўмита президенти Александр Жуков, фахрий президенти Виталий Смирнов ва бошқа мутассади шахслар иштирокида бўлиб ўтди.

Ирина Винер-Усманова бу мукофотни бутун жаҳон бадиий гимнастикасига берилган мукофот деб билишини айтди.

“Менинг тимсолимда бутун жаҳон бадиий гимнастикаси тақдирланди, деб ҳисоблайман. Биз нафақат Россия бадиий гимнастикасини кўтаришга ҳаракат қиламиз. Бизга рақиблар, рақобатчилар керак. Ғалаба қилиш учун олдинга ҳаракат қилиш керак. Шунинг учун бизда, Россияда кўплаб давлатлар вакиллари машқ қилишади”, деб айтди Винер-Усмонова.

Винер-Усмонова бадиий гимнастика Олимпия ўйинлари дастурида қолишига умид билдиришини айтиб ўтди.