Acer компанияси нарх борасида хромбуклар билан рақобатлаша оладиган, Windows 10 операцион тизимида ишловчи арзон Cloudbook ноутбуклари сериясини сотувга чиқаришга тайёрламоқда. Мисол учун, 11,6 дюймли экранга эга Acer Aspire One Cloudbook августда 169 доллардан сотувга чиқарилади. Шунингдек, 14 дюймли экранга эга ноутбук сотувга чиқарилишга тайёрланмоқда.

Айни пайтда бозорда Windows негизидаги 200 доллар атрофида таклиф қилинаётган ноутбукларни кўплаб учратиш мумкин, мисол учун, Acer Aspire E11, ASUS EeeBook X205 ва HP Stream 11 ноутбуклари. Бироқ 169 долларлик Aspire One Cloudbook айни пайтда Windows негизидаги ноутбуклар орасида энг арзони бўлиши мумкин.

Компания ноутбукнинг батафсил кўрсаткичларини ошкор этмаган, бироқ бу ноутбукда юқори унумдорликка эга бўлмаган процессор, кичик тезкор хотира ва қаттиқ диск, 1366 × 768 нуқтали экран, хуллас қиммат бўлмаган компьютердан кутиш мумкин бўлган ҳамма нарсага эга бўлишини тахмин қилиш мумкин.

Aspire One CloudBook каби компьютерлар Microsoft га арзон ноутбуклар сегментида Google билан рақобатлашишга ёрдам беради.

149 доллардан таклиф қилинаётган Google Chrome OS негизидаги ноутбуклар содда фойдаланувчи интерфейси, тез ёқилиши ва чекланган муҳитда ишлагани учун нисбатан хавфсизликка эгалиги билан ажралиб туради. Бироқ хромбукда Windows учун мўлжалланган дастурларни ишга тушириб бўлмайди ва бу ҳолат баъзи фойдаланувчиларнинг эътирозларига сабаб бўлмоқда.