Расмий Теҳрон билан имзоланадиган келишув Эрон ядровий дастурининг тўла тўхтатилишини назарда тутиши керак. Бу ҳақда 19 июль куни Исроил бош вазири Биньямин Нетаньяху АҚШнинг АВС телекомпаниясига берган интервьюсида баёнот берди.
Эслатиб ўтамиз, 14 июль куни Венада Эрон ва воситачилар олтилиги ўртасида ўтказилган музокаралар якунларига кўра ядровий дастур бўйича келишувга эришилган эди. Аммо келишув шартлари Исроилнинг норозилигига сабаб бўлиб келмоқда.
Келишув қандай шаклда бўлиши кераклиги ҳақидаги саволга жавоб бераркан, Нетаньяху “Демонтаж эвазига демонтаж” кераклигини таъкидлаб ўтди:
“Санкцияларнинг олиниши эвазига Эрон ядровий дастурини демонтаж қилиш. Маъмуриятнинг дастлабки нуқтаи назари шунақа эди; ўйлайманки, бу тўғри қараш эди”.
Аслида эса, бош вазирнинг фикрича, келишувга кўра Эрон “икки нарсага ҳам эришди”: “У ядровий инфраструктурани сақлаб қола олади, санкциялар эса қисқа муддатли истиқболда бекор қилинади”.
Нетаньяхунинг фикрича, ушбу келишув Исроилнинг ва бутун Яқин Шарқнинг хавфсизлигига таҳдид солади.