19 июль куни Чўлпонота шаҳрида бўлиб ўтган Қозоғистон ва Қирғизистон бош вазирлари Карим Масимов ва Темир Сариев ўртасидаги музокаралар чоғида Қирғизистон ҳукумати раҳбари Чуй вилоятидан ўтадиган чегара ҳудуди бўйича алоҳида келишув имзолашни таклиф қилди. Бу ҳақда “Вечерний Бишкек” нашри ёзмоқда.
Сариевнинг сўзларига қараганда, Тўқмоқ шаҳри яқинида Иссиқкўлга элтувчи Бишкек-Норин-Тўруғарт автойўли Қозоғистон ҳудудидан транзит билан ўтади. Бу ҳудуд 800 м ни ташкил қилади.
“Бишкекдан Иссиқкўлга боришимизда йўл Қозоғистон чегарасини кесиб ўтади, 800 м дан сўнг йўл яна ичкарига киради ва ўзига хос кўричакни ҳосил қилади. Биз ушбу чегара участкасидан фойдаланиш бўйича алоҳида келишув имзолашни таклиф қиламиз. Ахир яқин орада ягона иқтисодий иттифоқ таркибида бўламиз. Агар келишув имзоланса, биз ушбу йўл участкасини қарамоғимизга оламиз”, – деди Сариев.