Қирғизистонда ИШИД гуруҳи террорчиларига ёрдам беришда айбланиб собиқ парламент депутати қўлга олинди. Бу ҳақда миллий хавфсизлик қўмитаси матбуот бўлимига таянган ҳолда ТАСС агентлиги хабар бермоқда.
Хабарномада айтилишича, собиқ депутат Манас аэропортида мамлакат ташқарисига чиқиб кетишга ҳаракат қилиш чоғида қўлга олинган. Унинг исми-шарифи ҳозирча ошкор қилинмади. Фақатгина 2006-2010 йилларда “Оқ йўл” партиясидан парламентда фаолият юритгани айтилди.
Миллий хавфсизлик қўмитасининг ишонтиришича, собиқ депутат 16 июль куни йўқ қилинган террорчилар гуруҳига бевосита алоқадор бўлган, жумладан, унга пул ва қурол-аслаҳа етказиб турган.
Эслатиб ўтамиз, махсус қисмлар томонидан Бишкек ва унинг атрофида ўтказилган тезкор тадбир давомида ИШИДнинг 6 аъзоси ўлдирилган ва 7 нафари қўлга олинган эди.