Мумбаида 1993 йили содир этилган бир қатор қўпорувчилик ҳаракатларининг ташкилотчиларидан бирига ўқилган қатл ҳукми шу йилнинг 30 июль куни ижро этилади. Бу ҳақда NDTV телеканали хабар бермоқда.
Ҳиндистон президенти ва барча судлар афв этиш ҳақидаги илтимосномани рад этди.
Айтилишича, қатл вақти Махараштра штати бош вазири Девендра Фаднавис томонидан белгиланган. Қатл қилинувчининг оиласи ҳам бохабар этилган.
“Ёқуб Нагпур ёки Пунадаги Йервада қамоқхонасида осиб ўлдирилиши мумкин”, – деди Нагпур қамоқхонаси бош назоратчиси Йогеш Десаи.
Мемон исмли шахсга ўлим ҳукми 2007 йили чиқарилган эди. 2013 йили олий суд ҳукмни тасдиқлади. Мемон жиноятни амалга оширишда иштирок этмаган бўлса ҳам, террорчилар билан ҳамкорлик қилишда иштирок этганликда айбланган эди. Иш бўйича асосий айбланувчи унинг акаси, Йўбарс лақабли Иброҳим Мемондир. У 1993 йили Ҳиндистонни тарк этганидан буён топилгани йўқ.
1993 йилнинг 19 май куни Мумбаининг турли қисмларида 12та портлаш содир этилди. Турли маълумотларга қараганда, 257 кишидан 300 кишигача ҳалок бўлди. 700 ёки 1 400 киши яраланди. Терактлар Мумбаи жиноят оламининг энг йирик вакилларидан бири, ўша пайтда Покистонда турган Довуд Иброҳим томонидан режалаштирилган эди. Ҳиндистон ушбу воқеаларда Покистоннинг ҳам қўли борлигини иддао қилган эди.
Тахминларга кўра, бу ҳужум 1992 йилда Уттар-Прадешнинг Айодхя шаҳридаги Бабри Масжиднинг радикал ҳиндлар томонидан бузиб ташланишига жавобан амалга оширилган.