21 июль куни Ўзбекистон Ташқи ишлар вазири Абдулазиз Комилов Европа Иттифоқининг Марказий Осиё бўйича махсус вакили Питер Бурианни қабул қилди.

Суҳбат чоғида Ўзбекистон ва ЕИ ўртасидаги ҳамкорликнинг ҳозирги ҳолати ва ривожлантириш истиқболлари ҳамда турли соҳалардаги қўшма лойиҳаларни амалга ошириш жараёни муҳокама қилинди.

Мулоқот давомида Европа Иттифоқининг Марказий Осиё бўйича Стратегиясининг амалий аҳамияти ва самарадорлигини ошириш масалалари юзасидан фикр алмашилди ҳамда долзарб халқаро ва минтақавий муаммолар кўриб чиқилди.

Учрашувда ЕИнинг Ўзбекистондаги Делегацияси раҳбари, элчи Юрий Штерк иштирок этди.