20 июль куни Арманистон ташқи ишлар вазири Эдвард Налбандян ва ЕҲХТ Минск гуруҳи раислари Игорь Попов (Россия), Жеймс Уорлик (АҚШ) ва Пьер Андрие (Франция) Тоғли Қорабоғ муаммоси бўйича музокаралар ўтказди. Бу ҳақда Арманистон ТИВ матбуот хизмати ахборот берди.

Налбандяннинг баёнотига кўра, Озарбайжонда Европа ўйинлари ўтказилганидан сўнг “Бокудан яна милитаристик баёнотлар берила ва провокациялар уюштирила бошланди”.

Шунингдек, у Боку Арманистон ва Озарбайжон кучлари тўқнашган жабҳада тинчлик режимини бузаётганлигини иддао қилди. Дипломатнинг фикрича, Бокунинг хатти-ҳаракатлари Арманистон ва Минск гуруҳига аъзо давлатларнинг музокара жараёнини бир текис олиб боришига тўсқинлик қилмоқда.

Эслатиб ўтамиз, 19 июль куни Озарбайжон Арманистонни тинчлик режимини бузганликда айблаганди.