Америкалик машҳур боксчи Флойд Мэйвэзер Андре Берто билан 12 сентябрь куни жанг ўтказиш ҳақида шартнома имзолаган. Бу ҳақда TMZ сайти хабар қилди.

Портал маълумотларига кўра, томонлар Невада штатидаги Лас-Вегас шаҳрида жойлашган спорт саройида 12 сентябрь куни 12 раундлик жанг ўтказиш бўйича келишиб олишган.

Берто бу маълумотни тасдиқлади. У ўзининг бу имкониятидан фойдаланишга уриниб кўриши ҳақида айтиб ўтган.

Қайд этиш жоизки, бу жанг Флойд Мэйвэзер учун Showtime телеканали билан тузилган шартномага кўра ўтказилиши керак бўлган жанглардан бири бўлади. Боксчи ўша кунги жанг фаолиятидаги энг охирги жанг бўлиши ҳақида маълум қилганди.

Маълумот учун, Мэйвэзер 66,68 кг вазн тоифасида WBC, WBO, WBA камарларига эгалик қилади. 7 июль куни ундан камари олиб қўйилган. Унинг ҳисобида 48та ғалабали ўйин бор (48-0, 26 KO).

31 ёшли Берто эса 30 марта ғалабали ўйин ўтказган ва 3 марта мағлуб бўлган. У охирги марта шу йилнинг мартида WBА титули учун Хосесито Лопесга қарши рингга чиқиб, ғолиб бўлганди. У 2008-2010 йиллар мобайнида WBC камарига эгалик қилган, 2011 йилдан эса IBF бўйича камарни олган.