Янги ўқув йилида Остона олийгоҳлари талабалари, уларнинг ота-оналари ва ўқитувчилари коррупция ҳақида WhatsApp орқали хабар бериши мумкин бўлади.
Kazakhstan Today нашрининг ёзишича, ёшлар масалалари бўйича шаҳар бошқармаси томонидан WhatsApp учун ягона рақам очилади. Бу ҳақда бошқарма қошидаги ёшлар сиёсати бўйича қўллаб-қувватлаш жамғармаси директори Бақитжон Жунисбеков маълумот берди.
“Коррупцияга қарши кураш тўғрисида”ги қонунга асосан амалга оширилаётган ташаббус порахўрлик ҳолатларини камайтириш ва бутунлай бартараф қилишга йўналтирилади. Порахўрликда ушланганлар қаттиқ жазоланади.
Жунисбековнинг фикрича, университетларда “пора олишга гижгижлаш” усулидан фойдаланиш мақсадга мувофиқ бўлади. Бунда талаба ёки унинг ролини ўйнаётган тартиботчи ўқитувчи ёки масъул шахсга пора беришга ҳаракат қилади.