Туркия ва Нидерландия фуқаролигига эга бўлган Ирфан Демирташ Европа ва Осиё мамлакатлари бўйлаб "Ўзбекистон ислом ҳаракати" ташкилоти учун одамларни ёллаганликда ҳамда ташкилот учун хайрия маблағлари йиғиш билан машғул бўлганликда айбланиб, АҚШ суд маҳкамасига келтирилди. Бу ҳақда АҚШ Адлия вазирлигининг матбуот хизмати хабар берган.

Хабарда аниқлик киритилишича, 56 ёшли Демиртошга нисбатан АҚШ прокуратураси 2011 йилнинг декабридаёқ 4 банд бўйича сиртдан айблов эълон қилганди. У террорчи ташкилотни қўллаб-қувватлаш ҳамда бошқа молиявий жиноятларни амалга оширганликда айбланади.

Маълум қилинишича, Насруллоҳ лақаби остида ҳаракат қилган ушбу шахсга 70 йиллик қамоқ жазоси белгиланиши кутилмоқда. АҚШ ҳуқуқ-тартибот органлари маълумотларига кўра, у қўлга олингунига қадар АҚШ, Россия ва Нидерландия ҳудудида фаол ҳаракат олиб борган.

Адлия вазирлигида маълум қилинишича, Демиртош шу йилнинг январида Германияда Интерпол сўровига биноан ҳибсга олинганди. 17 июль куни у АҚШга экстрадиция қилинган.

Маълумот учун, "Ўзбекистон ислом ҳаракати" ("Туркистон ислом партияси") террорчи ташкилот ҳисобланиб, Покистон, Афғонистон, Туркия, Иордания, Нидерландия ва Францияда ўз бўлимларини ташкил қилган.