Теннис бўйича норасмий жаҳон чемпионати ҳисобланган Дэвис Кубогининг плей-офф босқичига қуръа ташланди, деб хабар бермоқда Olamsport. Унга кўра, Ўзбекистон терма жамоаси лиганинг жаҳон гуруҳига чиқиши учун АҚШ билан кураш олиб борадиган бўлди.

Ўзбекистон – АҚШ терма жамоалари учрашуви 18-20 сентябрь кунлари Ўзбекистонда ўтказилади. Тез орада Ўзбекистон теннис федерацияси ушбу учрашувнинг қайси шаҳарда ўтказилишини расман эълон қилади. Катта эҳтимол билан учрашув Тошкентда бўлиб ўтади.

Маълумот учун, бу уриниш Ўзбекистон терма жамоаси учун жаҳоннинг энг кучли 16 терма жамоаси сафига кириш учун ўнинчи уриниш бўлади.

Эслатиб ўтамиз, Петр Лебедь бош мураббийлигидаги ўзбекистонлик теннисчилар 17-19 июль кунлари Тошкентда Жанубий Корея терма жамоасини 3:2 ҳисобида мағлуб этиб, плей-офф босқичига йўлланма олган эди.

Ўзбекистон терма жамоаси Дэвис Кубоги рейтингида 27 ўринда қайд этилган.