АҚШнинг Пенсильвания штатида яшовчи эр-хотин Женн ва Фил Томпкинс тухум қўювчи товуқларни ижарага беришни таклиф қилмоқдалар ва бу хизмат тухум нархининг кўтарилиши ортида оммалашиб кетди. Reuters ахборот агентлигининг хабар беришича, жуфтлик ўз бизнесини 2013 йилнинг бошида бошлаган. Айни пайтга келиб АҚШ ва Канададан 200 га яқин киши Томпкинсларнинг мижозлари ҳисобланадилар.

АҚШда тухум нархининг кўтарилиши билан RentTheChicken.com деб номланган бу лойиҳага қизиқиш ортиб кетди. Июнь ойида тухум нархи парранда гриппи эпидемияси туфайли 85 фоизга кўтарилиб кетди. Эпидемия давомида бутун АҚШ бўйлаб миллионлаб товуқлар йўқ қилинди.

Товуқнинг ижарага берилиши мижознинг яшаш жойига қараб 400 долларга яқинни ташкил қилади. Томпкинслар иккита тухум қўювчи товуқ ҳамда унга қўшимча равишда товуқхона ва йўриқномани йилнинг 4 иссиқ ойидан 6 ойигача ижарага берадилар. Одатда товуқлар ҳафтасига 8-14 та тухум қўяди. Ижара муддати охирида мижозлар товуқларни сотиб олишлари мумкин бўлади.

Қайд этилишича, АҚШда охирги йилларда шундай хизмат турлари кўпайиб кетган.