Фарғонада сифат сертификатисиз сотилаётган болалар бўтқаси сотувдан чиқарилди. Бу ҳақда “Бозор ва истеъмолчи” газетаси маълумот берди.
Айтилишича, Фарғона шаҳар истеъмолчилар ҳуқуқини ҳимоя қилиш жамиятига Қувасой шаҳрида яшовчи С. Ғуломов мурожаат қилиб, марказий деҳқон бозори ҳудудида жойлашган озиқ-овқат дўконларидан биридан сотиб олган Nestle болалар бўтқасининг сифатига шубҳа билдирди.
Мурожаатнома юзасидан дўконда ўтказилган текширув натижасида бўтқанинг сифат сертификати мавжуд эмаслиги аниқланди. Бундан ташқари, савдога чиқарилган печенье, пряник маҳсулотларининг ишлаб чиқарилган санаси, яроқлилик муддати кўрсатилмагани, қадоқланган шакар, чучваранинг ҳеч қандай маълумотлари кўрсатилмагани ва колбаса маҳсулотларини сақлаш шартлари бузилганлиги маълум бўлди.
Дўконнинг 4 нафар сотувчиси махсус иш кийимлари билан таъминланмаганлиги ҳам эътиборга олинди.
Юқоридаги ҳолат юзасидан тегишли чора кўрилиши учун хусусийлаштириш, монополиядан чиқариш ва рақобатни ривожлантириш давлат қўмитасининг вилоят бошқармасига маълумотнома юборилди.