Буюк Британиянинг Линкольншир графлигида сувсизликдан азият чекаётган ҳолда кулранг тюленнинг оч-наҳор қолган, 5 кунлик боласи топиб олинди.

Уни яқин орада ўтлаб юрган сигирлар ва шу жойга яқин жойда кузатув олиб бораётган орнитолог топиб олди.
Тюлень боласи сув кўтарилиши пайтида онасидан ажралиб йўқолиб қолган бўлиши тахмин қилинмоқда. У дала четида лойда ётганда уни сигирлар тўдаси пайқаб қолди. Сигирлар тюлень боласини ўраб олиб, унга тумшуқлари билан суркала бошлаганлар.

Сигирларнинг бундай ғалати хатти-ҳаракатлари Уош бўғози соҳилидаги қўриқҳона ҳудудида кузатув олиб бораётган орнитолог Ян Эллиснинг эътиборини ўзига тортди. У узоқдан туриб, дурбиндан тюленчани кўришга муваффақ бўлди. Эллис ён атрофда катта тюленлар йўқлигини кўриб, бу ҳақда қўриқхона ходимларини хабардор этди.

Топиб олинган тюлень қўриқхонанинг 50 йиллиги муносабати билан Celebrity (Байрам) деб аталди. Ҳозир табиий боғ ходимлари тюленчани ёғли сельд билан боқишмоқда. Бошида тюленча заиф бўлган, бироқ сув ва озуқа уни бир пастда ўзига келтирди.

“Биз тюленча сув кўтарилиши пайтида онасини йўқотиб, адашиб қолган ҳамда сув қайтганда саёзликда қолиб кетган, деб тахмин қиляпмиз. Сигирлар жуда қизиқувчан ҳайвон бўлади, улар тюленчани олдига тўпланиб олишган. Селебритининг асосий муаммоси шундаки, у беш кун қаровсиз қолиб кетган ва натижада вазн йўқотган ҳамда сувсизланган”, дейди Natureland қўриқхонаси директори Ричард Идон.

Бир неча кундан кейин тюленча жуда бўлмаганда 30 кг вазн йиғиб, озуқа топишни ўрганиб олса, яна бўғозга қўйиб юборилади.