Ўзбекистон Республикаси Президентининг 2013 йил 25 июлда имзоланган “Қарши шаҳрининг йўл-транспорт коммуникацияларини ривожлантириш ва қурилишининг истиқболли режаси Дастури тўғрисида”ги Қарори ижроси юзасидан “Қарши-Шаҳрисабз” йўналиши бўйича 127 км узунликдаги автомобиль йўли тўлиқ таъмирланиб, цемент-бетон қопламали йўлга айлантирилмоқда. Бу ҳақда “Ўзавтойўл” ДАК матбуот хизмати хабар берган.

Хабар берилишича, воҳадаги икки қадимий шаҳарни боғлаб турган – 4Р-79 автомобиль йўлининг Қарши шаҳридан чиқувчи 0-10 км.лари ҳамда ушбу йўналишдаги - М-39 автомобиль йўлининг Шаҳрисабз шаҳрига кираверишдаги 1174-1185 км.лари оралиғида реконструкция ишлари амалга оширилмоқда.

Қурилиш ишлари “Ўзавтойўл” ДАК тизимидаги Автомагистрал бирлашмаси кўприк қурилиш участкаси ҳамда “Тошкенткўприк” корхоналари томонидан бажарилмоқда.

Ушбу автомобиль йўлларининг бир томонлама қисми, яъни икки тасмаси сентябрь ойида тўлиқ фойдаланишга топширилиши кутилмоқда.

Мазкур йўлнинг фойдаланишга топширилиши Ўзбекистоннинг жанубий ҳудудларида яшовчи аҳоли учун қўшимча қулайлик яратиши таъкидланган.