2015 йилда Чирчиқда жойлашган “Ўзбекистон қийин эрувчи ва ўтга чидамли материаллар комбинати” АЖ 16 тонна қаттиқ қотишмали материаллар (подшипниклар учун втулкалар, ойна учун пармалар, перфораторлар учун бурғилар) ишлаб чиқаришни режалаштирган. Корхона маълумотларига кўра, ушбу материаллар 2014 йилга нисбатан 7 фоиз, 2013 йилга нисбатан эса 19 фоизга кўпроқ миқдорда ишлаб чиқарилади.

2014 йилда корхона ўз маблағлари ҳисобидан 202 минг долларга 500 тонна юқори ҳароратга чидамли керамика ишлаб чиқаришни ўзлаштириб олди. Ўзбекистон саноатининг турли мақсадлар учун мўлжалланган керамик буюмларга (қолипланган, қолипланмаган, пўлатни қуйиш учун стопор маҳсулотлар) эҳтиёжи 11,7 млн долларга баҳоланмоқда.

Комбинат 2017 йилга қадар водород-кислород цехи компрессор станциясини модернизация қилиш ҳисобига газ баллонларида кислород ишлаб чиқаришни йўлга қўяди.

Ушбу янги маҳсулотга саноат, қишлоқ хўжалиги, қурилиш ва маиший хизмат кўрсатиш соҳалари катта эҳтиёж сезмоқдалар.

Истиқболли ишлаб чиқаришнинг унумдорлиги йилига 1,5 млн куб метр кислородни ташкил этиши кутилмоқда.

Корхона прогнозларига кўра, асосий маҳсулот – молибденнинг 2015 йилда ишлаб чиқарилиш ҳажми 570 тоннани, вольфрамники эса 110 тоннани ташкил қилади.