Фавқулодда вазиятлар вазирлигининг ҳудудий бошқармалари мутахассислари томонидан ёз мавсумида болалар вақтини сермазмун ўтказиш ҳамда фавқулодда вазиятларга оид билим кўникмаларини мустаҳкамлаш мақсадида жойларда бир қатор тадбирлар ташкил этилмоқда.

Хусусан, жорий йилнинг 15 июль кунида Андижон вилояти Булоқбоши тумани “Шифокор” Болалар соғломлаштириш оромгоҳида болалар ўртасида “Ёш қутқарувчи” мусобақаси ўтказилди.

Мусобақа Андижон вилоят ФВБ ташаббуси билан Булоқбоши туман тиббиёт бирлашмаси, Маданият ва спорт ишлари бўлими мутахассислари, оромгоҳ раҳбарияти ва тарбиячилари ҳамкорлигида ташкил этилди.

Мусобақада 3 та гуруҳ, “Халоскор”, “Тезкор” ва “Фидокор” жамоалари ўзаро беллашди. Ушбу гуруҳларга оромгоҳнинг 30 нафар дам олувчи болалари жалб этилди.

Мусобақада “Фидокор” гуруҳи ғолиб деб топилди ва барча иштирокчиларга мақтов ёрлиқлар ҳамда эсдалик совғалари топширилди.

Мусобақа ўтказиш давомида дам олувчи болаларга, оромгоҳ раҳбар ва ходимларига ёнғин хавфсизлиги қоидаларига амал қилиш, ота-оналар томонидан келтирилган, тез айнийдиган озиқ-овқат маҳсулотларини оромгоҳ ҳудудига киритмаслик чораларини кўриш, сунъий сув ҳавзасида чўмилишда сузиш мураббийси томонидан болалар хавфсизлигини таъминлаш, чўкиш билан боғлиқ бахтсиз ҳодисаларнинг олдини олиш, тоғ ён бағирларига саёҳатни чеклаш, оромгоҳ тадбирларини салқин пайтларда ўтказиш, ҳамда озиқ-овқат маҳсулотларини сақлаш ва тайёрлашда санитария-гигиэна талабларига қатъий риоя этиш бўйича вилоят ФВБ мутахассислари томонидан тегишли тушунча ва кўрсатмалар берилди.