Бугунги кунда ўзбек хонандалари орасида лицензияси тугатилганлари кўп учрамоқда. Ушбу лицензиясидан ажралган хонандалар нималардан маҳрум бўлади? Улар концерт, телевидение ёки радиода қўшиқларини "айлантириши" мумкинми? Шу каби саволларга жавоб олиш учун "Ўзбекнаво" Эстрада бирлашмасига мурожаат қилдик. 

"Ўзбекнаво"нинг Kun.uz сайтига маълум қилишича, лицензияси бекор қилинган хонанда Ўзбекистон Республикаси Вазирлар Маҳкамасининг 2001 йил 29 июндаги "Концерт-томоша фаолияти соҳасида солиқ солишни ва аудио-видео кассеталарни тарқатишни такомиллаштириш чора-тадбирлари тўғрисида"ги 285-сонли қарорига мувофиқ жисмоний ва юридик шахслар белгиланган тартибда "Ўзбекнаво" Эстрада бирлашмаси томонидан берилган лицензиясиз концерт-томоша фаолиятини амалга ошириш, тўй, юбилей ҳамда бошқа тантаналарда хизмат қилиш, телевидение ҳамда радиоларда ўз қўшиқларини тақдим этишга ҳақли эмас, деб белгиланган. 

Лицензия бериш тўғрисидаги ҳужжатлар, шунингдек улар бўйича хулосалар тайёрлаш Миллий эстрада санъатини ривожлантириш ва мувофиқлаштириш кенгаши ҳузуридаги Ижодий кўмаклашиш вакиллари гуруҳи томонидан кўриб чиқилади.