Москва вилоятининг Балашиха шаҳрида махсус хизматлар томонидан экстремистик фаолиятга алоқадорликка текширувдан ўтказиш учун 20 дан кўпроқ киши қўлга олинди. Бу ҳақда “Интерфакс” ахборот агентлиги вазиятдан хабардор бўлган манбага иқтибос келтирган ҳолда хабар бермоқда.

Манбанинг маълумотларига кўра, 24 июль Россия махсус хизматлари ходимлари махсус хизмат кучлари билан бирга турар-жой биноларидан бирида жойлашган намозгоҳга ташриф буюриб, у ерда келиб чиқиши Осиё ва Шимолий Кавказлик бўлган 20 дан кўпроқ одамни қўлга олди. Айни пайтда улар экстремистик фаолиятга алоқадорликка текширилмоқдалар.

Москва вилояти ички ишлар бош бошқармаси матбуот хизмати ушбу операциянинг амалга оширилганини тасдиқлади. “Тезкор маълумотни амлага ошириш доирасида фуқароларнинг ҳуқуқбузарлик фаолиятига алоқадорлигини текшириш бўйича тадбирлар ўтказилди”, деб айтилмоқда бош бошқармада.