Руминия суди 89 ёшли Александр Вишинескуни геноцид амалга ошириш айблови билан 20 йилга озодликдан маҳрум этди, деб хабар бермоқда Reuters ахборот агентлиги. Руминияда бундай ишлар 1989 йилда мамлакатнинг собиқ президенти Николае Чаушескунинг қатл этилишидан буён кўрилмаган эди.

1956-1963 йиллар давомида Вишинеску ишлаган Римнику-Сэрат қамоқхонасида ўнлаб сиёсий маҳбуслар вафот этган. Тергов маълумотларига кўра, собиқ қамоқхона ходими Вишинеску маҳбусларни урар, очлик билан тинкасини қуритар, уларга тиббий ёрдам кўрсатилишига йўл бермасди. Унинг бу харакатлари оқибатида камида 12 маҳбус ҳалок бўлган.

Вишинескунинг ўзи фақатгина буйруқни бажарганини айтмоқда.

1947 йилдан Руминия элитасининг ярим миллионга яқин вакили Римнику-Сэрат қамоқхонасининг маҳбусига айланган. Сиёсий маҳбуслар қамоқхонада чидаб бўлмас шароитлар, дори-дармонлар йўқлиги ва қийноқлар амалга оширилиши устидан шикоят қилганлар. Қамоқхона 1963 йилда ёпиб юборилган.