Тошкент шаҳрининг Яшнобод туманида истиқомат қилувчи 4 нафар дўст ўртасида арзимаган сабаб билан жанжал келиб чиқди. Бунинг натижасида улардан бири оғир жароҳатлар олиб, реанимация бўлимига ётқизилди. Бу ҳақда туман ИИБ тергов бўлими хабар бермоқда.
Толиб Туробов, Достон Алиев, Диёр Маҳмудов ва Армен Аганесянлар узоқ йиллар дўст бўлиб келишган. Бу йигитлар кечалари билан “кўча санғиб”, безорилик қилиб юришгани айтилмоқда.
Бир куни Аганесяннинг телефони ва пуллари йўқолган. Буни Туробовдан кўрган Аганесян бошқа дўстлари билан унинг уйига борган ва кўчага чақирган.
Кўчада ўзаро мулоқот чоғида Аганесян Туробовни ҳақорат қилиб, уни “каламуш”ликда айблаган. Бундан жаҳли чиққан Туробов дўстига мушт кўтарган. Аммо ундан кучлироқ бўлган Аганесян уни ерга ётқизиб, тепкилай бошлаган. Маҳмудов ва Алиевлар ҳам Аганесянга қўшилган. Тепкилар зарбидан Туробов хушидан кетиб қолган.
Кечки соат 23:00да Туробовнинг онаси ўғлидан хавотир бўлиб, ташқарига чиққан ва унинг ерда хушсиз ётганини кўрган. Аёл дарҳол 102га қўнғироқ қилган.
Безорилар қўлга олиниб, жазога тортилди, Туробов эса оғир жароҳатлар билан шифохонанинг реанимация бўлимига ётқизилди.