Championat.asia сайтида "ЖАР" стадионида фаррошлар йўқми?" номли фотохабар жойлаштирилди.

Хабар қилинишича, айни вақтда трибуна ўриндиқлари анча вақтдан бери чангдан тозаланмаган ҳолда қолмоқда.

"Мутахассислар келиб, аниқлаб беришмаса, чангни қўл билан артиш орқали бу ерда қанча вақтдан буён фаррош ишламаганини аниқлаб бўлмайди", деб ёзилади хабарда.

Муаллиф стадиондаги бу ҳолатни дастлаб "Машъал" ва Ўзбекистон олимпия терма жамоаси ўйинида қайд қилган ва кейинги учрашувга ҳолат яхшиланганига умид қилган ҳолда ташриф буюрган.

23 июль куни ўтказилган Ўзбекистон миллий терма жамоаси ва Ўзбекистон олимпия терма жамоаси иштирокидаги ўйинда ҳам мухлислар чанг ўриндиқларда ўйинни томоша қилишга мажбур бўлишган.

Хабарда ёзилишича, "Оқ-Тепа" ва "Насаф" жамоалари ўртасидаги ўйин ҳам шу стадионда бўлган ва бунинг учун пойтахтликлар кичик бўлмаган суммани тўлаб ҳам беришган. Шунда ҳам ҳеч бўлмаса VIP ўриндиқлар артилмаган.

Шунингдек, стадионда ОАВ вакиллари учун махсус жойда шароит бутунлай қониқарсиз экани таъкидланган.

"Ўз пайтида не-не мухлисларни кўрган бу стадионга эндиликда чангга аллергияси бор мухлисларнинг киришини уларнинг соғлигини ўйлаган ҳолда, ман қилиш керак", деб огоҳлантиради муаллиф афсус билан.

ВИПга кирган одам, ВИП даражасида ўтириши керак...

Лекин ВИПдаги манзара бундай бўлса. Бир киши айтган экан: - яхши ҳам осмонда сигирлар учмайди...

Манави чанг босган ойнали деворда ОАВ вакиллари ўйин суратини чизиб бемалол таҳлил қилсалар бўлади...

Ўйинга келган 1000 нафарга яқин мухлисларнинг деярли барчаси уйларига қўшимча иш олиб бордилар. Кимдир онасига, кимдир синглисига, яна кимдир аёлига шимларини ювиб беришни илтимос қилган бўлишса, ажаб эмас...

Стадионда фаррош йўқ деб бўлмайди. Тушлик вақтида ювилган гиламларни қуритиш учун трибунага осиб қўйишган. Лекин бундан айрим ишқибозлар унумли фойдаландилар.