Россиянинг “Ю.Гагарин номидаги фазогирларни тайёрлаш илмий-тадқиқот синов маркази”нинг етакчи мутахассислари Тошкент яқинида жойлашган Халқаро аэрокоинот мактаби – ХАКМ-2015 да машғулотлар ўтказишади.

Мактаб Ўзбекистон Фанлар академияси Шавкат Воҳидов номидаги Халқаро аэрокоинот мактаби, “Коинот” АЖ, Тошкент политехника университетининг аэрокоинот факельтети ва Россиянинг “Россотрудничество” ташкилотининг Тошкентдаги ваколатхонаси томонидан ташкил этилган. Бугунги кунда ХАКМ ўтган йилларда унда иштирок этган МДҲ, Болгария, Буюк Британия, Германия, Покистон, Франция ва АҚШ вакилларини бирлаштирмоқда.

“Кичик юлдузлар академияси” 26-маротаба чақирилмоқда. Бутун йил давомида коинот илмига қизиққан 14 ёшдан 17 ёшгача бўлган ёш истеъдодлар турли тест синовлари орқали ХАКМга келиш учун танлаб олинди. Бу ерда болалар назарий ва амалий машғулотлар ўтадилар.

Тошкент вилояти Паркент туманининг табиий зонасида Россия ва Ўзбекистондан 30 дан кўпроқ курсантлар 10 кун давомида машғулотларнинг кенг дастурини ўзлаштирадилар. Бу дастурга илмий-техник, маданий ва махсус жисмоний тайёргарлик машғулотлари киритилган. ХАКМдаги машғулотлар Альберт Эйнштейннинг нисбийлик назарияси кашф этилишининг 100 йиллигига ҳамда мактабни яратиш ташаббусчиси, Ўзбекистон академиги Шавкат Воҳидовнинг хотирасига бағишланади.