24-25 июль кунлари давомида Туркияда олиб борилган аксилтеррор операциялар давомида турли террорчи ташкилотларга алоқдадорликда гумон қилиниб, мамлакатдаги 22 вилоят бўйлаб 600 нафарга яқин киши ҳибсга олинган. Бу ҳақда мамлакат бош вазири Аҳмад Довудўғлу маълум қилди.

"Биз "ИШИД" ва Курдистон ишчилар партияси томонидан бўлиши мумкин хавфнинг олдини олиш чораларини кўряпмиз. Ўтган тунда полиция ва махсус хизмат ходимлари яна 288 кишини қўлга олди ва терроризмга алоқадорликда гумон қилиниб қўлга олинганларнинг сони 590 нафарга етди", деб маълум қилди бош вазир.

Унинг таъкидлашича, мамлакат парламенти учун сайловлар ўтказилган 7 июнь кунидан бери Туркияда 212 қуролли ҳужум, 15 кишининг ўғирлаб кетилиши ва 281та теракт содир этилган. Натижада ҳуқуқ-тартибот ходимларининг 5 нафари ҳаётдан бевақт кўз юмган.

Эслатиб ўтамиз, 20 июль куни Туркиянинг Сурия билан чегара қисмидаги Суруч шаҳрида 30 кишининг ўлимига сабаб бўлган теракт ва 23 июль куни Сурия ҳудудидан отилган снаряд туфайли Килис вилоятида турк чегарачиси ҳалок бўлишидан кейин, ҳукумат терроризмга қарши кенг кураш бошлади. Мамлакат ичкарисида олиб борилаётган аксилтеррор ҳаракатлари билан бир вақтда чегара ҳудудидан туриб Сурия ва Шимолий Ироқдаги жангариларнинг ҳарбий объектларига ҳаводан ҳамда қуруқликдан зарбалар йўлланмоқда.