Япониянинг Окинава префектурасидаги аэропортларда 100дан ортиқ авиарейслар бекор қилинди. Бунга мамлакат ҳудудига "Халола" номини олган кучли тайфун яқинлашаётгани сабаб бўлди.
NHK телеканалида маълум қилинишича, ҳудудда кемалар қатнови ҳам тўхтатилган.

Япония метеорология агентлиги хизматининг маълум қилишича, бу табиий офат Японияга 25 июль куни кечаси етиб келади. Маълум қилинишича, тайфун тезлиги секундига 35 метрни ташкил этади. Айни вақтда тайфун соатига 15 км тезлик билан ҳаракатланган ҳолатда Окинава префектурасига яқинлашмоқда.

Мутахассислар Окинава ва Кагосимада кучли ёмғир бўлишидан огоҳлантиришган. Қирғоқ ҳудудларида денгиз сатҳи 8 метр баландликка кўтарилиши мумкинлиги айтилган. Тахминларга кўра, тайфун Окинавадан ўтиб, шимоли-шарқдаги Хонсю оролига ҳам зарар етказиши мумкин.

"Халола" тайфуни жорий йил ҳисобида Тинч океани ҳудудидан Шарқий Осиёга яқинлашаётган ўн иккинчи тайфун бўлади.
1 ҳафта олдин Японияга "Нангка" тайфуни етиб келган ва мамлакатнинг жануби-шарқий ҳамда марказий қисмига зарар етказиб, 4 кишининг ҳалок бўлишига, 56 кишининг жароҳат олишига сабаб бўлганди. Ўшанда ҳукумат 500 минг кишини хавфли ҳудудлардан эвакуация қилганди.