7х7 нашри атоқли ўзбек актёри, Ўзбекистон халқ артисти Ёдгор Саъдиев билан суҳбат уюштирди.

Бироз олдинроқ, ушбу актёр узоқ вақтлик ижодий танаффусдан кейин (15 йил - Кун.уз изоҳи), санъатга қайтиб, май ойида Ўзбек Миллий академик драма театри саҳнасида "Имон" спектаклида бош рол ижро этганди.
Драматург Иззат Султон асари асосида режиссёр Марат Азимов томонидан саҳналаштирган мазкур спектаклда Ёдгор Саъдиев жонлантирган бош қаҳрамон, профессор, илм фан фидоийси Йўлдош Комилов ўз ўғлининг айнан илм соҳасида қаллобликка қўл уриб, плагиаторлик қилишига дуч келади.

Уюштирилган суҳбат давомида актёр узоқ вақт танаффус туфайли ролга киришиш бироз қийин кечганини тан олган.

"Айниқса, асардаги 20 варақдан ортиқроқ сўзларни ёдлашга қийналдим. Лекин меҳнат қилиш орқали ҳар қандай қийинчиликни енгиш мумкин. Спектакль якунида мухлисларнинг олқишлаши ҳар қандай қийинчиликни унунттиради", дейди санъаткор.

Журналист Ёдгор Саъдиевнинг иш столидаги асарни пайқаб қолади ва актёрдан бу янги спектакль учун мўлжаллаб ёзилган асар эканини билиб олади.

Маълум бўлишича, "Гулизорим" номли бу асар театрдаги асосий ижодкорлардан бири Эркин Хушвақтов томонидан навбатдаги спектакль учун ёзилган бўлиб, яқин вақт ичида бу асар саҳналаштирилиши режалаштирилган.

Ёдгор Саъдиев асардаги бош роллардан бирига ўзининг санъатдаги доимий ҳамкори Гулчеҳра Жамиловани таклиф этиш ниятида эканини билдирган.