2016 йилнинг апрель ойида БРИКС тараққиёт банки томонидан тақдим этиладиган илк кредитлар юань валютасида берилади. Бу ҳақда банк раҳбари Кундапур Ваман Каматхга асосланиб, Outlook of India нашри хабар берган.

Хабарда айтилишича, банк президенти Хитой бош вазири Ли Кэцян билан телефон мулоқоти чоғида бундай банк яратиш БРИКС мамлакатлари ўртасидаги ҳамкорликни мустаҳкамлаши қайд этган.

Бироз олдинроқ, Шанхайда БРИКС банкини ривожлантириш бўйича дастлабки ишлар бошлангани маълум қилинганди. Банк олдига қўйилган асосий мақсад ташкилот таркибидаги мамлакатларнинг инфратузилма ва девелоперлик лойиҳаларини молиялаштириш ҳисобланади. Ташкилот аъзолари банкка ҳар йили 2 млрд доллардан, жами 10 млрд доллар маблағ ўтказиб беришга келишишган.

Эслатиб ўтамиз, Хитойнинг Шанхай шаҳрида 21 июль куни БРИКС тараққиёт банки расман очилганди. Банк ташкил этилиши тўғрисидаги шартнома 2014 йил 16 июль куни Бразилиядаги саммитда имзоланган бўлиб, у Халқаро валюта жамғармасига муқобил бўлиши кўзда тутилган.