АҚШдаги Сиракьюс университети профессори Сэм Ван Акен 40 хил мева тугадиган ажойиб мевали дарахт яратди. Олим қишдан олдин бир дарахтга турли мевали дарахтларнинг шоҳларини пайвандлаб, улар туташиб кетишини кутади.
“Мен, моҳиятан, дарахтни лойиҳалаштиришим мумкин – унга истаганча шакл бериб, унинг қандай гуллашини бошқаришим мумкин”, деб айтмоқда Ван Акен.
Гибрид дарахтларда 40 гача турдаги мевалар: олхўри, шафтоли, ўрик, гилосларнинг турли навлари мевага киради.

Олимнинг тасдиқлашича, бу ғоя дастлаб бир санъат объектидек ўйланган эди. “Мен одамлар битта дарахтда турли рангдаги ғунчалар гуллаши ҳамда барча мевалар бир вақтда етилишини кўришларини истаган эдим”, деб таъкидламоқда олим.
Йилнинг аксарият қисми давомида дарахт оддий кўринишга эга бўлади. Бироқ баҳор келиши билан унда пушти, оқ, малинасимон ғунчалар гуллашни бошлайди.

Ван Акеннинг тажрибалари 2008 йилда бошланган. Битта дарахтни яратиш учун унга 5 йил керак бўлади. Айни пайтда АҚШ бўйлаб музейлар, жамоатчилик марказлари, шахсий уйларда шундай 16 дона кўп мевали дарахт ўсмоқда. Олим яқин истиқболда шаҳар шароитларида кичкина гибрид дарахтлар боғини яратишни режалаштирмоқда