Австралиянинг Перте шаҳридаги ҳайвонот боғида Суматра орангутанининг антиқа урғочиси қафасдан қочиб кетиб, боғ ҳудуди бўйлаб бамайлихотир сайр қилиб юрди. Бу ҳақда 9news.com.au портали хабар бермоқда.

5 ёшли Телити лақабли ушбу орангутан ўзининг онаси Путери билан яшаган қафасдан чиқиб кета олди. Телити ташриф буюрувчилар учун мўлжалланган йўлакда юрганда пайқаб қолинди. Орангутаннинг қўлида сувли идиш бўлган.

Ҳайвонот боғида таъкидланишича, Телити “жуда киришимли ва қизиқувчан” ёш орангутан бўлгани учун ўзини антиқа тутган. Маймун бироз боғ сарҳадларини айланиб чиқиб, ўз “яқинлари” билан бўлиш кўпроқ мароқли эканини тушуниб етган.

Ҳайвонот боғида воқеа батафсил тергов қилинмоқда.