Тошкент вилоятининг Бўстонлиқ туманида жойлашган «Чорвоқ» сув омбори яқинидаги дам олиш масканларига олиб борувчи автомагистралда дам олиш кунлари машиналарнинг улкан тирбандликлари кузатилди. Кеча якшанба куни кечки пайт кузатилган бундай тирбандлик акс этган суратлар Фейсбукдаги «Водители Ташкента» гуруҳига жойлаштирилган.

Гуруҳ қатнашчиларининг фикрича, дам олиш кунлари аксар тошкентликлар айнан «Чорвоқ» сув омбори яқинидаги дам олиш масканларига ташриф буюришади. Натижада бу ҳудудларда савдо ва овқатланиш объектларида нархлар кескин равишда ошади. Шунингдек вақтинчалик ижара уйлар нархи ҳам кескин қимматлашади.

2015 йилнинг 26 июль куни кечга яқин дам олиш кунини якунлаб Тошкентга қайтаётган машиналарнинг кўплиги натижасида улкан тирбандликлар кузатилди. Сурат муаллифининг айтишича, тирбандликдан чиқиш учун қарийб икки соат вақт сарфланган.