Тошкент шаҳри Олмазор туманида “Ice and gold” корхонаси ишлаб чиқараётган “Пломбир” ва “Одноклассники” музқаймоқлари қадоғида СССР ёзувини кўриш мумкин. Бу ҳақда “Ҳуррият” нашрида ёзилган.

Тегишли мақолада билдирилишича, музқаймоқ қоғозига алвон пилотка ва қизил галстук боғлаган пионер қиз ҳамда қўш ўроқ-болға кўтариб бораётган йигит-қиз суратлари туширилган.

Қадоқда “Наркомпищепром СССР”, “Главхладопром”, “ОТК”, “ГОСТ” каби эски тузумга хос иборалар ҳам борлигини кўриш мумкин.

“Бугунги кунда ўзбек фарзандларига қўш ўроқ-болғага ўхшаган ҳавойи рамзларни тиқиштиришдан мақсад нима?.. Сиз нимани қўмсаяпсиз? Эски замонларни қўмсаб, юрагингиз ёняптими?” – дея ишлаб чиқарувчиларни саволга тутади мақола муаллифи.