Аҳоли оилавий поликлиникадаги ўз шифокорини уйига чақириш ҳуқуқига эга. Бу ҳақда Мирзо Улуғбек туманидаги 4-сонли оилавий поликлиниканинг умумий амалиёт шифокори Тожинисо Абдураҳмонова айтиб ўтди.
Бугунги кунда Ўзбекистонда уч мингдан кўпроқ қишлоқ врачлик пункти ва оилавий поликлиникада аҳолига бирламчи тиббий-профилактика ёрдами кўрсатилмоқда. Оилавий поликлиникаларнинг ихтисослиги, уларнинг аҳолига кўрсатадиган хизматлари ҳақидаги саволларга жавоб бераркан, Абдураҳмонова бундай муассасаларда ишлайдиган шифокорларнинг иш тартиби ҳамда вазифалари ҳақида батафсил гапириб ўтди.
“Оилавий поликлиникага хонадоннинг ҳар бир аъзоси мурожаат қилиши мумкин, – унинг сўзларини келтиради “Оила даврасида” нашри. – Аҳоли оилавий поликлиникадаги ўз шифокорини уйига чақириш ҳуқуқига эга. Бунинг учун поликлиникага қўнғироқ қилиб, манзили ва беморнинг аҳволи ҳақида маълумот қолдиради. Кейин участка шифокори ёки бошқа бир умумий амалиёт шифокори айтилган хонадонга бориб, беморга ташхис қўйиши ва даволаш муолажаларини тавсия қилиши мумкин. Агар беморнинг аҳволи оғир бўлса, йўлланма орқали бирор тиббий масканга юборади.
Бир кунда олти соатлик иш кунимнинг тўрт соатини поликлиникада кўрикларга ажратаман. Бу муддат оралиғида 17-20 нафаргача беморни қабул қиламан. Қолган икки соат давомида хонадонларга бориб, беморларни кўрикдан ўтказаман.
Масалан, менга 510 та хонадон бириктирилган. Хонадонларда чақалоқлар туғилса, 4-5 ҳафталигигача, ҳафтасига 2-3 марта бориб, она ва боланинг саломатлигини назорат қилиб турамиз. Икки ойлик бўлгач, чақалоқларни оилавий поликлиникаларга олиб келиб кўрикдан ўтказиб кетишади. Ёлғиз кексалар, сурункали беморлар, ногиронлар ҳолидан ҳар ойда мунтазам хабар олиб турамиз.
Бундан ташқари, ҳудудга бириктирилган ҳамширалар ҳам бир ойда бир маротаба оилаларга кириб, аҳолининг тиббий аҳволидан хабар олиб туришлари керак”.