УЕФА президенти Мишел Платини ФИФА президентлиги учун курашадиган бўлди. Бу ҳақда Платини ўтган ҳафта охирида баёнот берган. УЕФА раҳбари келгуси йилнинг 26 февралида бўлиб ўтадиган сайловларда ўз фамилияси бўлишини билдирган.

Платини ўзининг якуний қарорига тўртта минтақа конфедерацияларининг, УЕФАдан ташқари КОНМЕБОЛ, КОНКАКАФ ва асосийси Осиё конфедерациялари қўллаб-қувватлаганидан кейин келган. Агар мазкур конфедерацияга кирувчи ҳар бир давлат футбол уюшмалари унинг номзодини қўллаб-қувватласа Платини 144та овозга эга бўлиши мумкин бўлади. Бу унинг ФИФА президентлиги учун энг асосий номзод эканини кўрсатади.

ФИФАнинг амалдаги президенти Йозеф Блаттер бу лавозимда 1998 йилдан буён ишлаб келади. Жорий йил май ойида у яна бир марта 5 йил муддатга ФИФА раҳбарлиги учун тайинланганди. Бироқ ФИФА ташкилотидаги коррупцион жанжаллар натижасида у истеъфога чиқиши ҳақида баёнот бериб ўтганди.