Ливиянинг собиқ диктатори Муаммар Каддафининг ўғли Сайф ал-Исломга отиб ўлдириш жазоси тайинланди. Бу ҳақда "Ал-Жазира" хабар берди.

Ливия жиноят суди марҳум диктатор Каддафи тузуми давридаги 8 нафар юқори мансабли амалдорларни 2011 йилда юз берган халқ қўзғолони вақтида ҳарбий жиноятлар амалга оширганликда айблади. Суд Муаммар Каддафининг ўғлидан ташқари мамлакатнинг собиқ бош вазири Ал-Бағдодий ал-Маҳмудий ҳамда разведка бошлиғи Абдулла ас-Сунусийни ўлимга ҳукм қилган.

Маълум қилинишича, Сайф ал-Ислом жиноий ҳаракатларда иштирок этмаган, лекин Skype орқали кўрсатмалар бериб турган.

Айни вақтда Ливиянинг Зинтан шаҳрида жорий ҳукуматдан норози кучлар ўрнашиб олган ва улар марҳум диктаторнинг ўғлини озод этишни ният қилишган.

Маълумот учун, Сайф ал-Ислом 2011 йилнинг ноябрида Ливия ҳудудида қўлга олинган. Ўшанда Гаага трибунали ҳам уни инсон ҳуқуқларига қарши жиноятлари учун суд қилиш мақсадида ўзига топширилишини сўраган, лекин ливияликлар уни беришдан бош тортишганди.

Ливияда у ва бошқа собиқ амалдорлар устидан суд жараёни 2013 йилнинг октябридан буён давом этиб келаётганди.