Йилига Ўзбекистонга дунёнинг 70дан ортиқ мамлакатидан 2 млн сайёҳ ташриф буюради. Бу ҳақда “Ўзбектуризм” миллий компанияси тарқатган матбуот хабарномасида айтилди.

Маълум бўлишича, туристик хизматлар экспорти ҳажми 615 млн долларни ташкил қилади. ЯИМда туризмнинг улуши 2 фоиздан ортади.

Ўзбекистонда турли даврларга оид 7 мингдан ортиқ меъморий ва тарихий ёдгорликлар, 110та халқаро туристик йўналиш мавжуд.

Сайёҳларга 550 компания хизмат кўрсатмоқда. Шунингдек, мамлакатда жами 50 минг ўринга эга 500дан ортиқ меҳмонхоналар, мотель ва кэмпинглар мавжуд. Ўзбекистондаги 11та халқаро аэропорт мамлакатни жаҳоннинг 50та шаҳри билан боғлаб турибди.

Туризм соҳасининг бўлажак мутахассислари 5та олий ўқув юртида ва 12та касб-ҳунар коллежида тайёрланмоқда. Туризм соҳасида 200 минг киши фаолият юритмоқда.