Ўзбекистон Вазирлар Маҳкамасида Маданият, таълим, соғлиқни сақлаш ва ижтимоий муҳофаза масалалари комплекси ўрнида икки янги комплекс яратилди. Бу ҳақда ҳукуматдаги манбаларига асосланган ҳолда "Газета.уз" нашри хабар берган.

Шу тариқа, эндиликда бош вазирнинг олти нафар ўринбосари ўрнига етти нафар ўринбосари мавжуд.

Айни дамда, юқорида қайд этилган комплекс ўрнида Ёшларга оид сиёсат, таълим, маданият ва спорт масалалари комплекси ҳамда Соғликни сақлаш, экология ва инсон ҳаёти сифати масалалари комлекси пайдо бўлган.

Маълум қилинишича, Ўзбекистон Президентининг янги комлекслар яратиш тўғрисидаги қарори 23 июль куни имзоланган. Жорий ҳафта давомида Баҳодир Ҳодиев Ёшларга оид сиёсат, таълим, маданият ва спорт масалалари комплекси раҳбари ҳамда бош вазир ўринбосари сифатида таништирилиши кутилади.

Соғликни сақлаш, экология ва инсон ҳаёти сифати масалалари комлексини эса 2012 йилдан шу вақтгача Маданият, таълим, соғлиқни сақлаш ва ижтимоий муҳофаза масалалари комплекси раҳбари ва бош вазир ўринбосари сифатида фаолият кўрсатиб келган Адҳам Икрамов Ильҳамович бошқаради.

Маълумот учун, Баҳодир Ҳодиев Тошкент Давлат Иқтисодиёт университетининг собиқ ректори ҳисобланиб, 2010-2014 йиллар мобайнида Олий ва ўрта махсус таълим вазирлигида ишлаган. Шу кунгача Президент қошида фан, таълим ва маданият масалалари бўйича Давлат маслаҳатчиси сифатида фаолият кўрсатиб келаётганди.

Қайд этиш жоизки, давлат порталида Ўзбекистон Вазирлар Маҳкамаси таркибидаги бу ўзгаришлар ўз ифодасини топмаган.