АҚШнинг General Motors автомобилсозлик компанияси Chevrolet бренди остида энг жадал ўсаётган бозорлар учун янги автомобиллар қаторини яратиш ва Хитойнинг SAIC Motor компанияси билан ҳамкорликни кенгайтириш учун 5 млрд доллар сармоя киритишни режалаштирмоқда, деб хабар бермоқда Financial Times нашри.

Нашр маълумотларига кўра, GM ва SAIC умуман янги автомобиллар концепциясини ва маҳаллий шароитда ишлаб чиқарилган максимал кўпроқ миқдордаги бутловчи қисмлардан тўртта давлатда (Хитой, Бразилия, Ҳиндистон ва Мексика) йиғилувчи машиналар учун двигателлар яратмоқчи.

2019 йилдан янги моделлар GM томонидан ривожланаётган давлатларда сотилаётган B ва С синфидаги автомобилларнинг ўрнини босади. GM ва SAIC 2030 йил охиригача ушбу янги моделларни йилига 2 млн дона миқдорида сотишни кутмоқда. Шу билан бирга, ушбу компаниялар янги автомобилларни АҚШ ва Европага экспорт қилишни режалаштирмаяпти.

GM президенти Дэн Амманнинг айтишича, концерн Россия, Индонезия ва Таиланддаги фаолиятини қисқартирмоқчи, чунки бу давлатларда юқори рентабелликни таъминлаш жуда ҳам мураккаб.

GM’да 2030 йилгача ривожланаётган давлатлар дунё бўйлаб енгил автомобиллар савдосининг 88 фоиз ўсишини таъминлайди, деб ҳисобланмоқда.