2015 йилнинг биринчи ярми якунларига кўра Қозоғистон иқтисодиёти киши бошига ялпи ички маҳсулот кўрсаткичлари бўйича Россиядан ўзиб кетди. Башоратларга қараганда, йил якунларига кўра Қозоғистонда бу кўрсаткич киши бошига 12 424 долларни, Россияда эса 11 975 долларни ташкил қилади. Бу маълумотлар NB.kz нашри томонидан келтирилди.

Россия иқтисодиёт Ғарбнинг санкциялари боис мураккаб вазиятга учради ва эндиликда бир қатор жиддий қийинчиликларни бошидан кечирмоқда. Бу биринчи навбатда энергия хом ашёсига бўлган нархларнинг тушиб кетиши ҳамда шундан келиб чиққан рубль курсининг долларга нисбатан кучсизлиги билан боғлиқдир. ОПЕК башоратига кўра, Россияда ЯИМ 2015 йили 2.8 фоизга қисқаради ва 1.755 трлн долларни ташкил қилади, бу долларнинг 59 рублга тенг курси билан ҳисоблаганда 103.6 трлн рублни ташкил қилади. Россия аҳолиси сони энг камида 146.6 млн кишини ташкил қилади, шу тариқа жон бошига ЯИМ 706.5 минг рубль ёки 11 975 долларга тенг бўлади. Бу кўрсаткичнинг тушиб кетиши нафақат макроиқтисодий фоннинг бузилиши, балки аҳолининг Қрим ва Севастополь ҳисобига 2.3 млн кишига кўпайгани билан ҳам боғлиқдир.

Ўз навбатида, Қозоғистонда ЯИМ Осиё тараққиёт банки башоратига кўра 1.9 фоизга ошиб, 216.3 млрд долларни ташкил қилади. Бу ўртача 1 доллар – 189 танга курси бўйича 40.9 трлн тангани деганидир. Аҳолининг йилига 1.5 фоизга ошиши эътиборга олинса, йил якунида қозоғистонликлар сони 17.7 млн кишини ташкил қилади, жон бошига ЯИМ эса 2.4 млн танга ёки 12 424 долларни ташкил қилади.