Янги Windows 10 операцион дастури бутун дунё бўйича 29 июль куни сотувга чиқарилади. Бу ҳақда Microsoft компанияси матбуот хизматига таянган ҳолда РИА Новости агентлиги хабар бермоқда.
Windows 7 ва Windows 8.1 дастурлари фойдаланувчилари бир йил давомида янги версияни бепул олиши мумкин бўлади. Аммо корпоратив версиялар – Корпоратив Windows 7, Корпоратив Windows 8/8.1 ва Windows RT/RT 8.1 фойдаланувчиларининг дастурлари бепул янгилаб берилмайди.
Янги дастурий таъминот ускуналарни овозли буйруқлар ёрдамида бошқариш имконини беради. Бундан ташқари, ишлаб чиқарувчилар браузер муаммосини ҳал қилиш учун янги Microsoft Edge дастурини ишлаб чиқишди. Унинг ёрдамида фойдаланувчилар веб-саҳифаларда қўлёзма эслатмалар киритиши, дўстлар билан бўлишиши ва ўқиш режимида кўриб чиқиши мумкин бўлади. Файллар ва дастурларни топишни осонлаштириш учун Start менюси қайтарилди.