Япониянинг Isuzu Motors компанияси ва “Ўзавтосаноат” АК 29 июль куни Тошкентда Самарқанд автомобиль заводи устав капиталидаги 8 фоиз улушни сотиш олиш бўйича келишувни имзолади. Бу ҳақда “Ўзавтосаноат” АК матбуот хизмати маълум қилмоқда.

Томонлар Самарқанд автомобиль заводини узоқ муддатли ривожлантириш стратегияси, жумладан модель қаторини янгилаш ва кенгайтириш, маҳаллийлаштириш даражасини чуқурлаштириш, илғор япон технологиялари ва ишлаб чиқариш жараёнларини киритиш бўйича келишувга эришдилар.

“Isuzu Motors’нинг Самарқанд автомобиль заводи акциядорлари қаторига кириши бизнинг “Ўзавтосаноат” билан ҳамкорлигимизнинг кутилган босқичи бўлди”, деб таъкидлаб ўтди Isuzu Motors ижрочи вице-президенти ва директори Таканобу Фурута.

“Ўзбекистонда транспорт инфратузилмасини ривожлантириш ва саноат ишлаб чиқаришни фаол ривожлантириш бўйича амалга оширилаётган лойиҳаларни ҳисобга олиб, биз иқтисодиётнинг турли тармоқларида сифатли юк автомобилларига катта талаб борлигини кўрмоқдамиз”, деб қўшимча қилиб ўтди Фурута.

Isuzu Motors ва «Ўзавтосаноат» ўртасидаги ҳамкорликка 2007 йилда асос солинган. Сиқилган табиий газда ишловчи янги юк машиналари модели ишлаб чиқарилишининг ўзлаштирилиши бу ҳамкорлик ривожланишининг муҳим босқичи бўлди. Isuzu Motors “СамАвто”нинг технологик ҳамкори ҳисобланиб, заводда ишлаб чиқариладиган автобус, ўртача тоннаждаги юк машиналари ва бошқа тижорий техникага шасси ва двигателлар етказиб беради.